Отварање на Лапидариум по повод Денот на Музеите

Желбата да се остани засекогаш во колективната меморија на луѓето, преку вечноста на каменот, резултира со исклучително богата збирка на епиграфски споменици и камена пластика од прилепскиот регион, која од денес е дел од Лапидариумот на НУ Завод и Музеј - Прилеп. Лапидариум претставува место т.е. отворен простор, во кој се изложени камени споменици. Збирката на епиграфски споменици и камена пластика на НУ Завод и Музеј - Прилеп содржи над 100 експонати: надгробни стели, епиграфски натписи, скулптури, ари, архитектонска камена пластика, сончев часовник (хорологион), релјефни бисти, вотивни релјефи, антропоморфни стели, капаци од урни и еден милјоказ. Најрепрезентативни наоди претставуваат мермерната антропоморфна пластика и епиграфските споменици од античка Стибера, мермерни надгробни стели и ари од повеќе археолошки локалитети, од кои дознаваме за духовноста и верувањето во задгробниот живот на нашите предци.